എന്നിലേക്ക്
തിരിഞ്ഞു നോക്കിയപ്പോഴാണ്
നിന്നെ ഞാൻ തിരിച്ചറിഞ്ഞത്.
എന്നിലേക്ക്
വഴിതെറ്റിയെത്തിയപ്പോഴാണ്
നിന്റെ വഴി നീയും തിരിച്ചറിഞ്ഞത്.
എന്നിലേക്ക്
മഴയായ് പെയ്തപ്പോഴാണ്
നീയും നിറഞ്ഞൊഴുകിയത്.
എന്നിലേക്ക്
കാറ്റായി വീശിയപ്പോഴാണ്
നീയും നിറഞ്ഞാടിയത്.
എന്നിലേക്ക്
കണ്ണാടിപോലെ പുഞ്ചിരിച്ചപ്പോഴാണ്
നീയിന്നലെ നിന്നെക്കണ്ടത്.
എന്നിലേക്ക്
സ്നേഹപ്പൂക്കൾ പൊഴിച്ചപ്പോഴാണ്
നീയൊരു തണൽമരമായത്.
എന്നിലേക്ക്
തേൻമാവായി ചാഞ്ഞപ്പോഴാണ്
ഞാനൊരു മുല്ലവള്ളിയായത്.
എന്നിലേക്ക്
കാട്ടാറുകളൊഴുക്കിയപ്പോഴാണ്
നീയൊരു മുളങ്കൂട്ടമായത്.
എന്നിലേക്ക്
രാഗങ്ങളായ് പെയ്തപ്പോഴാണ്
ഞാനൊരു തംബുരുവായത്.
എന്നിലേക്ക്
പ്രളയമായ് നീ വന്നപ്പോഴാണ്
മണൽത്തിട്ടയായ് ഞാനലിഞ്ഞുപോയത്.
എന്നിലേക്ക്
നീ നിറച്ച ശ്വാസത്തിലാണ്
ഞാനും നീയും അതിജീവിച്ചത്.
രജനി
No comments:
Post a Comment