ഓർമ്മയിലൊരു രാധ
-------------------------------
പല്ലവിപോലും മറന്നുപോയി
ഒരു രാഗം കാറ്റിലലിഞ്ഞുപോയി
വിഷാദമേറും ഏതോ ഗാനം
അതിവിദൂരതയിലകന്നുപോയി.
വിരഹിയാമൊരു ഇണക്കിളിയാവാം
ഏകയാമൊരു മുളന്തണ്ടാകാം
വെറുതെ പൂത്തൊരു പൂമരമാകാം
ഏകാകികൾതൻ ഗാനം മൂളാൻ
തനിച്ചിരിക്കുവതാരോ.
കുങ്കുമം പൂശിയ
സന്ധ്യാംബരത്തിൻ
സ്വപ്നങ്ങളെല്ലാം
നിഴലിൽ മറഞ്ഞുവോ
രാത്രിയാമഴലിൻ കരിമ്പടക്കെട്ടിൽ
ഏതോ ഗദ്ഗദമുയരുന്നുവോ.
പാതിവഴിയിൽ നിൻ
കാലടിപ്പാടുകൾ
കാണാതെ പോയോ
അലയും രാധയെ നീ
അറിയാതെ പോയോ
എന്നുമവൾ വരുമീ
കടമ്പിൻ ചുവട്ടിൽ
കൊഴിഞ്ഞ പൂക്കളോ
കൊഴിഞ്ഞ കിനാക്കളോ
നീലക്കടലോ കാളിന്ദിയോ
ഏതോ ഓർമ്മകൾ തഴുകിയോ
ജൻമാന്തരങ്ങൾ അകലെയോ
കർമ്മ ബന്ധങ്ങൾ മറന്നുവോ.
ഒറ്റക്കുയിലിൻ പാട്ടിൽ
ഒറ്റമേഘം പറന്നകലുകിൽ
ഒരു വീണാനാദത്തിൽ
ഒരുപക്ഷെയവനെന്നെ
ഓർത്തിടാം
വിരഹിണി രാധയെ തേടിടാം.
കാലം കൈകളിലേന്തിയ
നീർക്കുടം
മഴയായ് പെയ്തിറങ്ങുമേതോ
രാവിൽ, രാധ മറന്നിടാം
എല്ലാ ഗാനവുമെങ്കിലും
മറക്കില്ലൊരിക്കലും
മായാമാധവവേണുഗാനം
ആ മായാമാധവവേണുഗാനം.
-----------------------------------------------
രജനി വെള്ളോറ
No comments:
Post a Comment